I Massaggi Thai secondo nonna Lina

Postato il da Maggio 1, 2016

I Massaggi Thai

La matina, come ‘n bradipo,
me movee pian pianet.
Ghe volea qualche minuto
par saltar do dal let.

Me inviee verso el bagno
e far le me funzion
co la gatela intorno
ris-ciando un rabalton.

Come na vecia machina
inpizee el motorin
sentendome in arivo
qualche novo dolorin.

No ere pì scatante,
energica, inpulsiva,
dison che i ani e ‘l resto
me fea pì riflessiva.

Ma co i massaggi thai
me sente pì eficente.
Propio come se avesse
rinovà la patente.

[nonna Lina – Angela Spanu]

Share

Lo Yoga secondo nonna Lina

Postato il da Aprile 27, 2016

YOGA

La Laura insegna Yoga
da maestra convinta.
La se impegna, la laora
doparando la so grinta.

Pareciada, ripulida,
la se invia verso sereta
a catarse coi so alievi
che i e pronti, che i la speta.

El tatami, el sugaman,
na tutina e po’ i calzet.
La consiglia par far yoga
de ‘ndar sol se tu se net.

Se scuminzia da sentadi
a scoltar quel che te dol,
po’, pianet se va anca avanti,
se fa mejo che se pol.

L’è na bela disiplina
la te insegna come far
a stirate, intorgolarte
e perfin a respirar.

A la fin: rilassamento.
Dò par tera destiradi.
Da la testa fin tei piè
se se cata indormensadi.

L’è na bela disiplina
e no l’è gnanca pecà
se te juta a viver mejo
un pochet pì rilassà.

[nonna Lina – Angela Spanu]

Share